لما كل جهاز فيه physical mac address؟

لما كل جهاز فيه physical mac address؟

ولما ال switch اللى فى ال Local network بيدور على الجهاز بال mac address

ليه ماستخدمناهوش بدل الـ IP؟

هقولك ليه.

اول حاجة .. انت محتاج تظبط الـ Mindset بتاعتك فيما يتعلق بتلك الأسئلة الوجودية

يعني لازم تبقى فاهم ان مش كل حاجة تنفع من الناحية الفنية يبقى بالضرورة "هنقدر" نطبقها

احياناً الأجابة بتبقى من نوعية "اللى حصل حصل"

تاني حاجة

عصر الشبكات الـ local او ال LAN بدأ لما تم تقديم الـ ethernet protocol فى السبعينات

على يد عالم اسمه "روبرت ميتكالف"

تم استخدام كابلات coaxel ساعتها .. (كابلات الدش اللى عندك فى البيت)

وتم توصيل كابل واحد طويل بين كل الأجهزة وعلشان نوصل الجهاز بالكابل

كان بيقشروا جزء فى الكابل ويربط فيه كابل قصير للجهاز نفسه

الداتا اللى ماشية فى النتورك ساعتها كانت بتعدي على كل الأجهزة اللى فيها

وكل جهاز ينقى ال packet اللى تخصه ويتجاهل اللى ماتخصهوش

كمية الداتا المنقولة فى الشبكة فى الفترة دي كانت قليلة فالوضع ده كان عادى (الى حدٍ ما)

الشكل ده من النتورك انت ممكن تكون درسته فى الشبكات تحت مسمى bus network topology

الهدف منه توفير الكابلات .. ايوا توفير الكابلات.

بس طبعاً الكلام ده ماينفعش النهاردة .. انت جهازك لوحدة بيستقبل كمبية داتا تخصه هو تحديداً كتير (حتى وانت مش بتعمل حاجة)

مابالك لو هيستقبل كل الداتا اللى ماشية فى النتورك بتاعة البيت او الشغل.

المهم الكلام ده للشبكات الداخلية

مش عايز اقول مكنش فى شبكات خارجية

بس نقدر نقول ان كان فى option لان يبقى فى remote computer ويقدر يتواصل مع main server عن طريق ال radio waves او ال satellite

لكن الأكيد ان مكنش فى شبكات wan زي النهاردة

وكانت ARPANET لسه بتطور وكانت منغلقة على بعض المؤسسات الحربية والأكاديمية

النسخة الأولى من الـ Ethernet مكنتش معتمدة على ال mac address بس كانت معتمدة على ان كل جهاز يكون له رقم

ال mac address ظهر بعد الـ Ethernet بكام سنة فى السبعينات برضه تم استخدامه مع ال Ethernet لاحقاً

الـ mac address كان مقسوم نصين .. اول نص هو ID للشركة المصنعة لكارت النتورك .. والنص التاني هو serial لكارت النتورك (حط خط هنا)

خد نفس الكلام اللى قلناه على ال Ethernet بس زود عليه ان الداتا اللى ماشية فى النتورك كانت شايله ال mac address الخاص بال source وال destination.

بعدين جه Vent Cerf فى السبعينات برضه وقدم لنا الـ TCP

ولو اول مرة تسمع عن Cerf فأحب اقولك ان ده السبب رقم واحد فى وجود حاجة اسمها انترنت النهاردة

معلومة جانبية كدة ان الـ TCP الحالي شكله مختلف نوعاً ما عن أول نسخة منه .. حتى الأسم الكامل كان مختلف

بس دي قصة تانية.

المهم ..

سيرف فى تقديمه للـ TCP قال احنا عايزين نوصل جهاز كمبيوتر فى نتورك بجهاز كمبيوتر فى نتورك تاني

وذكر صراحةً كدة كلمة internet وكلمة تانية ذكرها كتير وهى INTERNETWORK

علشان جهازين فى شبكتين منفصلتين يكلموا بعض

لازم يبقى فى حاجة اسمها network identifier نقدر نميز بيها النتورك اللى بنكلمها (حط خط تحت الجملة دي)

بالأضافة الى ان الجهاز الواحد ممكن يكون بيتكلم مع اكتر من نتورك فى نفس الوقت

فلازم كل نتورك تتواصل مع الجهاز عن طريق رقم او PORT name.

ويبقى عنوان الأتصال عبارة عن network id + TCP id + port name

وشكل العنوان ده هيبقى كالتالي: net.tcp.port

فى الحالة دي هيبقى عندنا عنوان unique لكل connection

سيرف قال اننا محتاجين نوع من ال Gateways يشتغل مع ال TCP علشان ياخد الداتا من النتورك ويحدد هيبعتها فين

او يستقبل الداتا اللى جاية للنتورك ويحدد إذا كانت بتاعتها فعلاً ولا لاً

بأختصار كدة كان بيتكلم عن الراوتر.

وعايز ازود معلومة كدة ان اى بروتوكول بنتكلم عنه مكنش message format او طريقة addressing فقط

لا ده كان بيحتوى على procedures كتير هيقوم بيها جميع الأطراف المشتركة فى تطبيق البروتوكول.

فى بداية التمانينات حصل تعديل جذري فى الـ TCP

وتم فصل نظام الـ addressing عن نظام تقسيم وتوزيع وتسليم الداتا

قالك فى اكتر من طريقة لازم تبقى موجودة لتقسيم الداتا وتوزيعها وفقاً لطبيعة الداتا

وان الجزء الخاص بالعناوين مش محتاجين يبقى مرتبط بالكلام ده.

وظهر بروتوكل مستقل بذاته اسمه Internet Protocol الشهير بـ IP

فكرة البروتوكول هى تحريك الداتا من نتورك للتانية لغاية مالداتا توصل للنتورك اللى بتدور عليها (حط خط هنا)

نظام الـ addressing المقترح هنا بيفرق مابين 3 حاجات

الأسم والعنوان والطريق .. name, address and route

الأسم هو الحاجة اللى بندور عليها (اسم موقع مثلاً)

العنوان هو مكان الحاجة دي فين بالظبط ( الـ IP address)

ال route هو ازاى نوصل للعنوان ( route tables الموجود فى ال routers)

الـ IP address المقترح كان طوله 4 bytes وكان مخصص اول byte بالكامل للنتورك والباقى لل Host او الجهاز اللى عايزين نوصل له

الفكرة هنا ان كان لازم يبقى فى عنوان للنتورك .. ولازم يكون فى طريقة كل ال networks تقدر توصل لبعضها

عن طريق ال routing

ونيجي بقى للنقطة اللى انت مستنيها

سيرف قال كل physical host لازم يكون قادر على انه يظهر فى النتورك وكأنه several distinct hosts

او بعبارة اخرى كل جهاز فى النتورك يبقى له اكتر من IP واحد (حطيت خط هنا ولا لسه؟)

بالأضافة الى ان الجهاز الواحد ممكن يكون فيه اكتر من physical address عادي برضه
منقول: Ahmed Metwaly